牛浩同山豬

【文、圖／鍾榮富／南臺科技大學應用英語系講座教授】

 

　　大路關坪頂个地形，遠遠看啊去，就一粒山坪，南有南河，北有北河，南河多石頭，北河多嫩沙。西片係南北河交接个所在，有嫩沙也有大石頭。歸个莊頭可以講三面環水，一面環山。山係東片个大武山。大路關人從細，自然學會撈蛇打拐(青蛙)，上山捉老鼠、蛇哥、白鼻花，或者山豬、山羌，各種動物都使得上桌。落水就捉毛蟹、釣魚仔、釣蛤蟆，摸土虱。對大路關个細人仔來講，無論上山亦係泅水，都係一種成長个必經過程。

　　人有百百種，每人各食一業。國小畢業以後，同學各奔四方。最近歸大路關，正聽著牛浩个故事。牛浩姓張，但係勇猛像牛，不論天時幾寒，佢都著一領薄薄个衫裌仔，大家人都喊佢牛浩。佢畜雞、畜鴨，開一間細店仔，賣小學生愛食个零嗒，生活還無會差。牛浩做人盡慷慨，好交朋友。下把下轉家鄉堵到佢，佢定著會邀𠊎入去啉茶、打嘴鼓。每擺聽佢講生活个種種生趣，感覺鄉下生活盡好。

　　無想著，舊年仔去尋牛浩料，佢煞往生了。聽講兩三年前，有一場盡大个雨。大路關每擺大雨，南北河都會做大水，水撲到駁棚項，遠遠看啊去，河水就像海恁大闊。大水還會對山頂項沖下來大大細細个大水樵，一向裡來都係會水个人賺外快个時節，拈著个樵使得賣盡多錢。該日，聽講牛浩同朋友兩儕出門去尋大水樵，一路沿等山路行。無想著間(佢等)行到口社後山項，影著山豬，又肥又大隻。兩儕共下用力，想出各種辦法，就恁樣捉著山豬。捆好山豬以後，慢慢綁到水脣，佢等又去尋了一支大水樵，將山豬䌈啊在大水樵項，想講順等河水，使得慢慢仔漂下來，到庄頭項正來尋人添手，共下㓾山豬，打鬥敘。當下，兩儕分路行，朋友行旱路歸莊項尋人手。牛浩在水中牽引大水樵同山豬。無想著，山豬有息把人性，在水上還盡用力掙扎，最後摎自家送進一个皺腡渦裡背。牛浩可能在渦裡背，同山豬駁鬥，試等將山豬拖出水流个路項。毋知樣般，無人知得。反正該日牛浩無歸莊項。大家在莊頭緊等緊毋放心。有人行山路，有人沿水脣，尋了兩日，正看著牛浩个屍體漂浮啊在皺腡渦裡背，跈等水轉來轉去。
　　
（四縣腔）鍾榮富教授 聲檔 － 牛浩同山豬





　

▲BACK